اجازة سعيدة وبداية جديدة

السلام عليكم ورحمة الله وبركاته

ايوه اجازة سعيدة وبداية جديدة واللي ميعرفش يعرف

من الاكيد ان الصفحة اللي بكتب فيها دي او المدونة مش اول ولا اخر مدونة كتبت فيها

بس اقدر اقول ده انسب مكان اقول فيه الكلام ده

لاني حاسس اني مر عليه حاجات كتير مش سهله في المكان ده

حلمت كتير وتعبت كتير وطلعت ونزلت واتغيرت بدل المرة الف مره

الجديد في الصفحة اني حققت حلم ياما حلمت بيه السفر 

لاني شايف فيه ووراه احلام كتير بتتحققلي من خلاله 

والحمدلله مطلعتش غلطان وفعلا حققت حاجات كتير كانت نقصاني وكملتها بسفري

غير اني خلاص واضح اني على ابواب الدنيا اللي ياما حلمت بيها 

واللي فيها هكسب لقب جديد عمري ما كنت اقدر اكسبه الا باني ادخل الدنيا دي

اي دنيا اللي بتكلم عنها ؟

ما كل الناس عارفه انهي دنيا طبعا 

دنيا التأهيل 

دنيا الاستقرار

دنيا الابوه وبداية المسئولية

مفضلش كتير على ان ده يحصل وكله بتساهيل ربنا ان شاء الله

انا خسرت كتير من سفري وجايز لو حسبتها اكون خسرت اكتر ما كسبت

بس عندي احساس جوايا وقناعة ورضا ان اللي ربنا قسمه ليه افضل بكتير من اللي كنت استناه لنفسي منه

لانه يعلم ما لا نعلم

عامة مش هطول عليكم 

انا خلاص نازل مصر راجع لبلدي بعد سنة طويلة عريضة من الشغل ومن المواقف التي لا تعد ولا تحصى

واللي اتعلمت فيها حاجات كتير بجد

اولها واخرة اني مأمنش لاي حد بسهوله وان مش كل صاحب صاحب بجد

وكمان اتعلمت اني لازم ابقى راجل واتحمل مهما حصلي في الدنيا دي لاني مش في الدنيا لوحدي وفي ناس مسئولة مني 

وفي ناس بتحبني ومحتاجاني في الدنيا دي

اوعدكم بانكم لما يكتبلنا الزمن نتقابل بعد السفر الطويل ده انكم تشوفوا بني ادم افضل بكتير من اللي عرفتوه قبل كده

وادعولي الايام دي تعدي بسرعة واوصل بالسلامة

واخيرا وليس اخرا 

في رعاية الله 

واخر دعوانا ان الحمدلله رب العالمين

 

Vacation Countdown

كلام جديد

السلام عليكم
وكل عام والامة الاسلامية كلها بخير
معقولة انا جاي هنا تاني اكتب وامتى بعد كل المدة دي
في نفس المكان اللي شاف مني كتير وكتير وقبل منه كمان اللايف سبيس
معقوله بعد كل السنين دي ارجع واكتب زي ما كنت بكتب
صحيح انا هو انا نفس الشخص بس شتان الفرق بين الظروف دلوقت والظروف زمان وقت ما كنت بكتب ليل نهار
اي فرق؟
تصدقوا مفرقتش كتير اوي ونفس الاسباب اللي كانت زمان بتخليني اجي واترمي في حضن الكتابة في مكانه حاسه ملكي ومحدش هيقولي لا فيه متقولش هي هي اللي جيباني دلوقت
كالعادة تعبان وانا امتى مكنتش تعبان
بس التعب المرة دي غير من كل النواحي
دلوقت لا عاد في أم تشيل عنك شوية تعب بحنيتها
ولا عاد في صاحب جدع او غير جده ترمي عليه حمولك
هقول ايه بس طبعا الحمدلله
بقيت حد لا يستهان بيه في مكان محترم اي حد يتمناه وصعب اوصله في سن زي سني
الايام عمالة تعدي وبكبر والمسئوليات معايا بتكبر
اخواتي اللي بقوا متعلقين في رقبتي وبقيت قبل ما اخطي اي خطوة افكر فيهم
وابويا اللي لازم اريحه واشيل عنه بعد كل السنين اللي تعب فيها عشاني ووصلني للي وصلت ليه
وحياتي اللي مبقتش عارف ليها معالم غير الشغل والخروج لما الفرصة تبقى مناسبة واكل وشرب ونوم وخلاص
وغيره كتير منه اللي ينفع يتكتب عنه هنا ومنه اللي لا
وتعب وزهق وضيق ودموع ملهاش عنوان
ووحدة وهجر وعذاب من كل الالوان
وعيشه حبه فوق وحبه تحت على واحد اصلا غلبان
كله همه يومه يعدي بسلام
يسمع كلمه حلوه من حد قريب منه تديله الامان
ان بكره مش زي النهارده واللي جاي احسن كمان
بس فين ده يلاقيه
وفين حضن حد يخبيه
لا تعليق على اللي فات ولا على اللي جاي
وهقول ايه واعيد ايه وليه
ما نصيبك هيصيبك ومسيره جاي جاي
ولحد هنا وخلص الكلام
واشوفكم مرة تانية في كلام في كلام

بيتي

مساء الخير على عيون الناس اللي بتقرا الكلام اللي انا متاكد مليون فى الميه ان فى الغالب مش هيقراه غيري وقلة من تربطهم علاقات بيه

عاملين ايه واخباركوا ايه

حقيقي ليكوا وحشة

ولا بلاش الكدب

الموقع وكتابتي فيه هي اللي وحشتني بردو

بردو مش تكدب

الحقيقة انا مبجيش هنا الا اما خلاص بحس انها متقفلة فى وشي

وان مفيش سبيل ليه الا اني اجي للمكان الوحيد اللي مش هيصدني

لاني عارف ومتاكد ان لا يمكن القلم هيبطل كتابة ولا عمر الافكار هتخلص من دماغي

كالعادة بلف لفتي بطولها بقصرها مهما غبت باجي فى النهاية هنا

حاسس ان هنا بيتي اللي باخد راحتي فيه

بحس أحيانا اني برتاح هنا اكتر ما برتاح فى اي حتة تانية مع اصحاب مع احباب ايا كان مع مين

جايز ده يرجع لاني هنا انا الوحيد صاحب الكلمة والقرار

وانا اللي بقول اه وانا اللي بقول لا

ومتمكن من الامور وعارف امتى اكتب وامتى اسكت وامتى اكمل من جديد

جايز تكون هي دي شخصيتي الحقيقية اني بحب اكون متحكم فى الامور وانا الامر الناهي فى اغلب الحاجات

الحقيقة مش عارف

انا بس جاي عشان اتكلم شوية واديني اتكلمت

واكيد راجع عن قريب او من بعيد

المهم اني راجع

وعارف انك لما هرجع مش هلاقي مكاني مشغول

وهلاقيه فاضي ومستنيني بترحاب

لان هنا بيتي

حقيقي بحب المكان هنا

وبحب وجودي فيه

سلام واشوفكوا بعدين ياللي شوفتوني

الحمد لله

فى الاول كده صباح الخير على الناس الجميلة واللي ذي العسل اللي وحشاني واللي شايف كلامي

طبعا مفيش مقدمة احسن من كده باين اني مفرفش ومزقطط وكله تمام بس نصيحة مني ليكم بلاش تخدوا بالظواهر

ما علينا مش هنخش فى متاهات

انا بس اصلي وحشني الكتابة كالعادة مش هقول اني مخنوق وانكد عليكوا

ولا هكدب عليكوا واقول اني مبسوط ومية فل واربعتشر

اصل العملية مبقتش بصراحة مستاهلة ذي الاول الدنيا كلها خربانة جات عليك انت يعني يا سمسم

على قولك والله يا سيدي هي يعني جات عليه

هيييييـــــــــيه دنيا

المهم

انا بصراحة كنت بقلب فى البلوج بتاعي وبشوف مواضيعي القديمة هنا وبشوف ردود الناس على كلامي فى احد المواضيع اللي كنت كاتبهم طبعا عن نفسي

والله تصدقوا انا حبيت نفسي مش غرور ولا حاجة انا ممكن اكون اخر واحد فى الدنيا دي يفكر انه يتغر بنفسه ولو اني شايف اني مجرد اني اقول الكلمة دي هو غرور مش موضوعنا

بس والله حبيت كلامي وحبيت حياتي برغم كل المشاكل اللي انا فيها

وراضي وعايش اهوه الحمدلله هقول ايه يعني غير الحمدلله

حكم البني ادم فى الدنيا دي لو مش رضى عن حاله صدقوني اكبر مصيبة فى الكون

وعلى العكس تمام والله العظيم البني ادم لو رضى عن حاله لو عنده مشاكل الدنيا كلها هيبقى مبسوط ومفيش اي حاجة وعايش ومش فارقة وياه

اقول ايه تاني

بس بجد وحشتوني ووحشني سمسم ووحشني كلامي ويا نفسي ووحشتني كل حاجة حلوة فى حياتي ضاعت مني

انا هسيب ليكم فى اخر الموضوع اللينك اللي كنت بقراه ليه الموضوع يعني اتمنى انكوا تقروه متهئ ليه هيعجبكوا لانه عجبني

ودلوقتي اسيبكم مع حاجة كده كتبتها من حوالي يومين ومعنديش مانع اني اشاركها وياكم جايز تعجبكم

حالماً أرى نفسي هائمأ أسعى ورائها فى الفضاء باحثا

فقد بحثت عنه فى كل ارجائي الحياة لعلي لها واجداً

ليس لها بمثيل لا هنا ولا هناك

ليس لهم ما لها من جمال وانفراد فى شخصية ذاتِ ذاتْ

أجل انها الوحيدة القادرة على قهر قلبي وأسره فى لحظات

لم أرى فى حسنها وجمالها مثيل

ولم أسمع بأذني دقات مثل دقات قلبها العليل

أثقل حبي قلبها ولم تقدر على حمل الحب بداخلها لكثير

نعم فقد أحببتني وحيداً ليس لي بشريك

اراني متفرداً على عرشٍ صنعته من أجلي فى قلبها الكبير

صنعته من طيب قلبها وحنانه والذي لم أرى له مثيل

خلقت من أجلي معنى جديداً للسعادة والبهجة والسرور

خلقته ُ فى رؤيتي لها وهي آتية مشعة بالنور

نورٌ نابع من قلبها وحبها نورٌ لتضيء بهِ قلبي الشغوف

تلك سعادةٍ لا تبعثها فى قلب غيري فمن هنالك قادر على اعطائها حبٌ بقدر حبي المهول

الأيام تمر علي يوماً تلو الأخر ولهفتي إليها تزداد مراراً

تعلم اني قد تعطشت أن أرتوى من حبها تكراراً

ليست ببخيلة أن تعطيني أياه فلديها من الحب بقلبها ما يكفي من الحب لسنين وشهور وأيام

ولكنها لا تريدني أن ارتوي الا بما استحق فى تلك الايام

فهل استحق أن أرتوي حتى ينتهئ ظمأي

ام أنها تريدني لدي من الظمأ ما لديها من الحب والعطاء والحنان

احترت فى ما تريده لي فبحق ان حيران

اتريدني بقربها مرتاحا سعيدا حالماً لحبها أسير

ام تريدني أن أرفرف بعيداً والنار تلتهف قلبي من العذاب المرير

ماذا انا وماذا تريد لي

الحب والشوق اللهيب ام العذاب والعطف المرير

مع تحيتي

سمسم

سؤال وجواب

اعمل ايه

السلام عليكم ومساء الخير عليكم جميعا

فى البداية انا مش شايف ان فى مساحة اني اهرج واهزر وسط كل اللي بيحصل وبيدور حواليه من أحداث

فى البوست اللي فات يعني تطرقت للموضوع من زاوية أو اخرى بس متعمقتش فيه ومكنش هدفي الاساسي من البوست الكلام اللي طلع

بس كالعادة انتوا واخدين مني على كده اني بحاول اجي افضفض ومببقاش راسم سيناريو معين للحوار امشي عليه

انما هي كده بتيجي ذى ما تيجي

كفاية رغي كتير وادخل فى الموضوع

غــــــــــــــــزة

وربنا ورب الكعبة ورب المصحف الشريف حرام اللي بيجرى ده

انا عارف ان جايز كلامي ولا ليه اي لازمة ولا هيقدم ولا هيأخر

بس انا بكتبه لاني من جوايا تعبت بجد تعبت انا زهقت يا ناس مش عارف اعمل ايه

بعيد عن اللي بيجرى ادامي فى الاعلام كل لحظة ومش قادر اغمض عيني انا تعبت بجد

انا عارف وانا رايح افتح التي في اني هشوف حد ميت دلوقتي او بيت اتفجر ومات كل اللي فيه

او طفل ملوش اي ذنب اتفقعت عينيه او بنت ملهاش اي ايد فى اللي بيجري بترت رجليها الاتنين

بجد انا خلاص بدات احس اني ايامي في الدنيا محدودة من اللي بشوفه كل يوم

ضغطي بيعلا وبحس ان مرارتي هتتفقع وبحس ان دمي بيغلا وقلبي بيتقطع

ناقصني ايه تاني عشان اموت

ولا الحكااااااااااااااااااااااااام بتوعنا مصر وقطر وايران وكله

ايييييييييييييه ده يا ناس يا ناس حرام عليكوا بجد اتقوا ربنا

ربنا مش هيعدلكوا اللي انتوا بتعملوه ده

مش هيعدي ليكوا انكم واقفين ساكتين وشايفين اخوانا وولادنا واماهتنا بيموتا فى حتة فى غزة وواقفين تتفرجوا

لا ومش بس كده

دا انتوا مش عايزنا احنا الشعب نطلع اللي جوانا ونقول لا والف لا

انا نفسي اشوف حاكم بجد مش خايف لا من اسرائيل وامريكا ولا اي حد فى الدنيا

ويتقى ربنا فى المكان اللي هو مسئول عنه

ويطرد السفير الاسرائيلي الكلب

ويجيب السفير بتاع بلده من اسرائيل ويقطع كل العلاقات بالبلد دي

احنا بناخد ايه من وراهم غير الحرب والدمار

هما بيدونا صدقة وانا مش عارف مثلا

احنا مش قليلن

احنا والله ما قليلين

المهم دلوقتي انا مش فى الحكام

انا فينا احنا

دلوقتي ادام الامر الواقع ده اعمل ايه انا والناس اللي دمها بيغلى من اللي بيحصل

مساعدات مادية واكل وفلوس وكلام من ده مش كفاية

دم وتبرعات بردو مش كفاية

مظاهرات بردو مش كفاية

ندعي ليهم ربنا يرحمهم بردو مش كفاية

كل ده مبيوقفش الناس اللي عمالة تموت كل يووووووووووووووووم

اعمل ايه

اعمل ايه

اعمل ايه

بجد ده اللي نفسي اعرفه ويارب حد يعرف يرد عليه
والسلام عليكم واسف اني طولت عليكوا

كل عام وانتوا محققين احلامكوا

مساء الخير عليكم جميعاً

وكل سنة وانتوا طيبين عدة علينا سنة بحلوها ومرها وجاية سنة جديدة ربنا وحده العالم باللي هيجرى فيها

انا مش بكتب عشان اهني الناس بالسنة الجديدة واقعد بقى اوزع هدايا وبابا نويل ومعرفش ايه لاني الحمدلله مسلم مش حاجة تانية

واحنا عندنا فى الاسلام عيدين اتنين لسة مقلوش لينا على العيد التالت ده

ولو فى عيد تالت يبقى اولى بينا عيد مولد سيدنا محمد عليه الصلاة والسلام مش حد تاني

ما علينا مش موضوعنا بس خطر ببالي مرة واحدة كده اجي واتكلم حتى اني مش عارف هتكلم عن ايه بالظبط

مش عارف السنة الجاية دي ظروفها ايه ويا ترى الموضوع مستاهل اني اقلق وافكر فى اللي جاي ولا عادي قضيها ذى ما انا مقضيها بحلوها ومرها وكان ولا حاجة اتغيرت

حقيقي مش عارف ايه الصح من الغلط فى الحكاية دي خصوصا ان الواحد مشاعره مختلطه اليومين دول بكذا حاجة خصوصا موضوع اهلنا فى غزة واللي عمالين نشوفه على الفضائيات

لدرجة اني بجد توهت فى موقفنا كمصريين شعب وحكومه واختلط عليه الامر كتير لاختلاف كلام الناس بين قناة والتانية وحتى على القناة نفسها اختلاف اراء الناس فيها

شوية يقولوا علينا عملاء وخونة

وشوية يتكلموا عننا ودورنا الرائد فى القضية الفلسطينية

وشوية يقولوا الحكومة السبب والشعب ملوش دعوة

وشوية تانيين يقولوا طالما احنا ساكتين يبقى اكيد احنا مشاركين انا حاسس انهم شوية وهيقولوا اني اسرائيلي وبحارب ويا اسرائيل بالرغم ان موقفي من القضية دي معروف ومحسوم

انا لو بايدي هشيل اي سلاح وهقتل فى الناس اللي بتقتل فى اخواني واخواتي فى فلسطين دول ومش هبطل الا اما هما يبطلوا يأذوا اخواني الفلسطينين

لكن طبعا ما باليد حيلة

اتخنقت اوي لما عرفت خبر الرائد المصري اللي اتقتل على الحدود من حماس خصوصا انه من هنا من بلدي من كفرالشيخ

مأثر فينا كتير الخبر ده وفى المنطقة وفى سخط من الجماهير والشعب هنا على تصرف حماس وبقى فى اتجاه ان حماس السبب فى كل اللي بيحصل ده

انا رغيت كتير اوي فى حكاية القضية الفلسطينية مع اني مكنش ده مرادي من دخولي هنا عشان اكتب بس الظاهر ان ده قدري اني اتكلم عنهم

عالعموم كل سنة وانتوا طيبين واشوفكوا على خير طوال السنة الجديدة دي ويارب كل يوم يعدوا عليكوا تحققوا فيه حلم وامنية من احلامكم وامانيكم اللي مش قدرتوا تحققوها السنة اللي فاتت

مع تحياتي

سمسم

Every night when i be alone i think in my dreams in this life
i think about my way in living this life
did i walk in the right way or not ?
a lot of questions i ask it myself and i can't find answer for it .
when i will get the perfect dream for me? .
i can't realy decide in this time . what is right and wrong to do ?
so i will live my life as i do for the time which i can get all of that in one drawing .
i wish i can be me
i wish i can find the next dream
i wish i can get it

With Regards

SeMSeM

النص التاني

فى البداية مساء الخيرة عليكم جميعا
طبعا اقصد عليكم جميعا بدي انا لاني تقريبا مفيش غيري بيشوف البوستات اللي بكتبها وكاني بكتبها لنفسي
وايه يعني ما انا فعلا بكتبها لنفسي
هو انا حد هيعرفني اكتر مني ولا هيقدر كلامي اكتر ما انا بقدره
اكيد لا طبعا
المهم مش موضوعنا ده
ذى ما تقولوا كده وحشتوني
اه فعلا وحشتوني
معرفش ازاي ومتسالونيش ازاي
بس حاسس اني نفسي اقعد القعدة بتاعتي اني ادخل على البلوج واشغل الميوزك الاصلي اللي مفيش احسن منه واقعد كده ادندن واكتب مع نفسي وذي ما تيجي
تيجي مرة حلم يجي مرة كابوس يجي وصف لحالة انا فيها المهم اني بكتب وبطلع اللي جوايا
جاي فى بالي دلوقتي اتكلم عن اني اتكلم ليه الواحد بيحتاج لبنت فى حياته
ودورها بيختلف ازاي من بين فترة والتانية
يعني اكيد طبعا احتياجك لبنت ودورها فى حياتك فى مرحلة المراهقة وايام الثانوي
غير الكلية وانك بدات تكبر
غير بعد التخرج والمسئوليات
غير الجواز ولحد هنا واقف لاني مدخلتش بعد كده
مش هكدب عليكوا انا نفسي اطلع حاجة فى صيغة شعرية لاني حاسس اني مكتبتش من زمان
لكن وانا بدور على الكلام اللي هكتبه على صوت الموسيقى
حاسس ان جوايا كلام كتير عاوز اقوله عن احتياجي للمرأة فى الوقت الحالي اللي انا فيه
وانا قاعد من شوية بشوف التلفزيون وبتفرج كالعادة على اي فيلم وبقلب فى القنوات
سرحت شوية فى حياتي بعدين لو حصل واتجوزت ويا ترى انا نفسي فى ايه من ورا الجواز

سرحت ووصلت اني نفسي من اني الاقي بعد ما ارجع من الشغل انسانة جميلة مستنياني تاخدني بالحضن تنسيني تعب اليوم كله فى الحضن ده

واعرف انها تعبت عشان تحضرلي الاكل الجميل اللي بحبه بعد يوم طويل انا كمان تعبان فيه فى الشغل

ونقعد سوا انا وهي ومبقاش لوحدي طول ما انا موجود فى البيت الاقيها جنبي بتأكلني وبتراعيني وبتشوف مصالحي

بعد ما خلص الاكل مش بتستنى اني اطلب اني محتاج حاجة اشربها لا عرفاني وعارفة اني محتاج ده فبالتالي بتلبيه ليه من غير ما تديني فرصة اني اطلب او احس بالنقص

نفسي الاقي لو حصل واتجوزت الراحة واني الاقيها فهماني ونفسها فى راحتي قبل راحتها من قلبها نفسها تشوفني سعيد تشوفني مرتاح وفرحان

نفسي كمان لما اجي انام واحتاج اني محسش لوحدي الاقي حضنها بيضمني واحس فيه بالحنان اللي كان صعب الاقيه من غير ما هي تبقى جنبي

نفسي كمان لما اصحى الصبح مفكرش ان كان اليوم هيبقى جميل ولا لا

بمجرد من اني ابص فى وشها الجميل وهي بتصحيني اعرف ان اليوم اكيد هيبقى مشرق وكله فرح وسعادة

نفسي احس اني عايش مع ملاك مش مجرد انسانة وظيفتها الطبخ والتنضيف والخلفة وتربية العيال والكلام اللي بسمع عنه من اغلب الناس المتجوزين

نفسي متبقاش حياتي روتينية معاها واللي بنعمله النهاردة عملناه امبارح وهنعمله بكره

مش عاوز كمان اشوف المشاكل اللي بتحصل بين اغلب الناس اللي اعرفهم وانا عاوزة كذه وانا محتاجة كذه والبيت ناقصه كتير والولاد تعبانين والمدرسة بتشتكي والدروس واللي واللي واللي الخ

لالالالالالا مش دي الحياة الزوجية اللي ممكن افكر فيها ابدا

عاوز انا كمان اريحها واعملها كل حاجة نفسها فيها قبل ما تفكر تحتاجها

عاوز احسسها انها ذى ما هي مقدراني قيراط انا مقدرها الف فدان

عاوز اعرفها ان مفيش حد بيديني الا وبياخد مني الطاق مرة واتنين والف

مش عاوز اظلمها وابقى مش مديها حقها

مش عاوز اكون مش مثالي فى نظرها ومش هو اللي حلمت بيه

مش عاوز صورتي تتهز ادامها وعاوز اكون دايما الصدر الحنون اللي تلجأ اليه لما تحتاج لده

الموضوع مش عارف اقول عليه سهل ولا صعب

بس كنت جيت ما بيني وما بين نفسي وقولت اني ممكن قرار غريب ناس كتير مش ممكن يوافقوني عليه

واني اعيش لوحدي فى شقة احط فيها كل حاجة بحبها واكفل طفلة يتيمة او طفل يتيم واربيه ويكبر معايا ونعيش انا وهو سوا

واكتفي بده ومش اتجوز فعلا وتبقى حياتي مقتصرة على اني اسعده واشوف الفرحة فى عينيه وبكده الفرحة اكيد هتدخل قلبي وهتعرف طريقها ليه

بس لما بقعد مع نفسي واتخيل كم الحنان والحاجات اللي ممكن افتقدها لو مش اتجوزت بفكر اني اعيد ترتيب اوراقي فى مسالة قراري ده

حقيقي الموضوع محير

والكل طبعا هيجي ويقول لا طبعا لازم تتجوز دي سنة الحياة ونص الدين ومعرفش ايه

بس انا باصصلها من منظور تاني خالص

من منظور سعادتي وسعادة غيري وحياتي وظروفي ومستقبلي وكل حاجة

الكل بيتكلم عن العرف واللي ماشي والتقليد وسنة الحياة

انما انا بتكلم عن حالتي انا مش عن حالة اجتماعية بندرسها وقاعدة عامة بنمشي عليها

ما علينا كفاية كده فضفضة النهاردة واسيبكم واروح انطلق الى سرير العزيز الي حقيقي هتستغربوا لما اقولكوا اني بعد الايام لحد ما اسيبه لاني معنى اني اسيبه اني انتقلت لحياة جديدة وهو ده اللي انا مستنيه

عاوز انتقل من مرحلة اني عايش تحت مظلة والدي ووالدتي لمرحلة اني ابقى مسئول عن نفسي فى كل قرار باخده فى حياتي وعايش حياة مستقلة بيها عن كل اللي حواليه فى كل حاجة تخصني

دلوقتي انا بتنهد تنهيدة كبييييييييييييييرة اوي اوي

يالا ما علينا بردو

اسيبكوا ونلتقي على خير عن قريب ان شاء الله

مع تحياتي

حبيبكم سمسم