تايه

بقالي وقت مش صغير مش دخلت هنا وكتبت وطلعت اللي جوايا كعادتي

مليون سبب وسبب مانعني من اني اقدر اكون على راحتي هنا فى الموقع

مع انه موقعي وليه مطلق الحرية فى اللي بكتبه فيه

الا ان فى جزء كبير من الجملة دي ميقدرش يتحقق

مينفعش اتكلم واخد راحتي على الموقع بالكلام لان كلامي معدش ينفع يعجب كل الناس

صحيح طول عمري مش بقدر اخلي كلامي يعجب كل الناس كان فى ناس بيعجبها وناس لا

انما دلوقتي الاقي حد من اللي حواليه عاجبه كلامي اللي هكتبه لانه استحالة يريح حد بعينه ولو ريح حد مش هيريح التاني

عايش وسط دوامة وضغوط كبيرة من الناس ومن نفسي ومن الظروف اللي حواليه فى كل حاجة فى حياتي

مش قادر اخد قرار ثابت وامشي عليه بقية حياتي حاسس بضياع حياتي من فترة طويلة مش لاقيت نفسي

حياتي مش مستقرة ذى ما كنت بحلم سواء مستقرة على الحزن او الفرح

دايما فى مطبات واكاد مبشوفش الفرح الا على فترات متباعدة

الفضفضة شئ جميل مفيش اجمل منه

لكن الحلو ميكملش يارتني اقدر اخرج هنا كل اللي انا نفسي اقوله

حاسس اني عليه قيود وعمرها ما كانت موجودة فى حياتي قبل كده

بس مسيري ارتاح واكيد اللي ربنا رايد ليه الخير فيه هيكون

ادعولي ربنا يهديني للصح وللخير ويقدملي دايما الخير ويبعد عني شرور الناس وشر نفسي

اوعدكم باني فى وقت قريب ارجع حسام اللي كنتوا بتحبوه

واللي كنت بحلم اني افضل عليه

حسام

الفارس

هو ده اللي انتوا بتدوروا عليه

ومسيركم تلاقوه

سأعود