هلاقي نفسي؟؟

ممكن اكون مخنوق وحزين وانا جاي اكتب البوست ده بس مش بايدي حيلة ومليش ذنب فى اللي بيحصلي

مكنتش اعرف ان القدر مخبي ليه كل ده

معرفش انه مخبي ليه وحدة وآهات فراق وعذاب وبعاد

معرفش انه مخبي ليه حرمان وتوهان وشوق لماضي فى يوم كان

مش حب ولا كبرياء ولا قلب انباع وراح عليه زمان

انما مبدأ وحياة وشخصية وكيان كان موجود فى يوم من الايام

حبي لذاتي ولنفسي وعشقى لوجودي فى مكان حاسس بيه انه عالمي الخاص

دايرة كبيرة وانا وسطها عمال ادور

مش لاقي حل فى لغز بدماغي بيدور

انا اللي جوا الدايرة ولا هي اللي حواليه

افصل افكر ولا اسيب الدايرة مطرح ما تدور تدور

مش بخانق نفسي لاني اصلا مش لاقيها

مش بعذب نفسي بأني ازود عليها

حياتي مش مستقرة بسبب اللي فيها

مش بايدي حاجة مش بايدي حل ليها

شغل استقرار مستقبل

حياة ماضي مستقبل

اهل اصحاب مستقبل

حاسس ان اي حاجة هفكر فيها لازم اشرك فيها المستقبل

خايف من بكرة واللي جايلي فيه

اللي عدى مقدرتش عليه

وبقول عدى خلاص وياريته مجاش

وخايف ترجع الايام للي كانت عليه

ربك يسهلها من عنده هو المسهل

قادر يحلها بحل مستعجل

يسهلها عليه من وسعه

ويكتبلي فى الدنيا راحه من عنده

اسيبكم تقروا كلامي وتدوروه فى دماغكم ولو اني عارف اني دماغي مش من دماغكم

انتوا فين وانا فين فيكم المرتاح وفيكم المحتاس بس مين فيكم مش لاقي نفسه

يالا هنقول ايه اهي دنيا بتدور وعمالة تعدي علينا ذى الكورة تمام بس بتلعب هي بينا

اسيبكم والقاكم عن قريب فى عالم جديد ابحث عنه بين تلك الكلمات لعلي اجده