سؤال وجواب

جاي أكتب كعادتي بعد نص الليل قريت كذا بوست فى كذا بلوج بشوف الجديد يعني

لفت نظري كتير بوست انسان وشوية اسئلة

تقريبا حسيت ان مهدى ليه بشكل أو بأخر وقررت اني ارد عليه هنا

بس لما ركزت وبعد مساعدة من اخت عزيزة عليه عرفت ان الموضوع مش مجرد موضوع مكتوب وحسيت انه ليه لوحدي

الموضوع مكتوب لكل واحد فى الدنيا محطش نفسه فى موقف انه يعرف هو رايح فين وجاي منين

احلامه ايه هيحققها ازاي العيشة اللي هو عايشها عجباه ولا لا مقضيها مش مقضيها الكلام ده كله

هسيبني من الكلام العام وهتكلم عن نفسي واثر البوست ده فيه

كتير لما اقرا اي بوست يأثر فيه وجايز يوصل بيه لمرحلة البكا لما التأثير يبقى على الجرح ذى ما بيقولوا

لكن بوست جيسي خلاني افكر كتير مش مجرد تفكير عادي من اللي بفكر كل يوم لكن تفكير فى اللي راح وفى اللي انا فيه وفى اللي جاي

بشكل تاني غير اللي دايما انا بفكر فيه

اااااااااااااااااااااااه يا أنى

من زمان متكلمتش مع حسام بالشكل ده اعذروني اصلي وحشتني نفسي وتقريبا بدات الاقيها والفضل يرجع للناس اللي بتهتم بده

جايز مش لسة اتعافيت من كل الجروح اللي جوايا او جايز لا يمكن فى يوم اتداوى منها بس مجرد اني الاقي نفسي دي خطوة كويسة فى حياتي

مالك يا حسام؟

اهو تعبان شوية من الدنيا وما فيها الظروف والخنقة واللي جوايا واللي بقلبي والمشاكل والناس والصحاب اللي مبقوش صحاب والقريب والبعيد والحيرة اللي عايش فيها ومستقبلي اللي مش عارفله ملامح محددة والتكملة فى الدراسة اللي اقحمت نفسي فيها لمجرد رغبة فى اني اكون احسن من غير ما يكون ليه هدف معين تاني من خلال الدراسة اللي ناوي اكملها والماجستير اللي ان شاء الله اخده .

يا نهار مش فايت كل ده يارتني ما سالتك

ياااااااااه انت مستكترهم دا انا جوايا كتير وكتير انا بديك نبذة عن اللي جه ببالي اول ما قولت السؤال وما خفي كان أعظم انت عارف ان مش كل حاجة اقدر اكتبها هنا فى البلوج

واخرتها يا ابن الناس هتفضل محتار لامتى هتفضل مستني انك ترتاح لامتى

ولا عارف اديني عايش لغاية ما يجي خبري من عند رب كريم

للدرجة دي وصل بيك اليأس الموت يا حسام

هو انت فكرك ان عيشتي دي عجباني يعني اكيد الموت ارحم انا اتخنقت من كل حاجة حوالية ومفيش حاجة فى الدنيا حاببها وللاسف كل حاجة بحبها بتهرب مني مش فاضلي غير شوية اخوات قطاطيط ربنا رزقني بيهم بس مش من ابويا وامي من هنا من على النت ومعوضني عن اي حاجة تانية والله هيعز عليه فراقهم

ايه يا عم انت فى ايه -- رسمت لنفسك دور انك مت خلاص ولا ايه ارحمنا يا عم من جو الكآبة ده

اوكي سوري يا سيدي مكنش اقصدي اني اشغلك بهمي نسيت ان همي محدش هيحس بيه اكتر من نفسي

نفسك - هو ده اللي انا جاي اكلمك فيه هي نفسك دي بقى

مالها نفسك ايه اللي فيها وايه حكاية مش لاقيها واين نفسي وشوية وهتنزل اعلان فى الجورنال فى ايه يابا متروق شوية كده

ابدا بس انا اصلي حاسس اني مخنوق فى فترة طولت عليه مش متعود على كده دايما كانت الخنقة اسبوع اتنين تلاتة بالكتير وبتعدي وبيجي اللي يخليها تعدي لحاجة اخف منها المرة دي الخنقة من مجاميعه مش مسألة قصة حب وحاسس فيها اني مجروح ولا مسألة اني تعبان وحاسس اني مش هخف الموضوع بقى اكبر بكتير اني مش لاقي لا نفسي ولا عارف انا فين ولا انا مين ولا امتى هتحرك من مكاني ده ولا هروح فين ولا هاجي منين

توهت منك بالراحة عليه وواحدة واحدة جايز افهمك واقدر اساعدك متستهونش بعبد ربنا الغلبان يوضع سره فى اضعف خلقه

ماشي يا سيدي انا معاك هحكيلك الحكاية من اولها لاخرها وذى ما تيجي ما هي خسرانة خسرانة جات عليك

ماشي يا عم حسام وانا سامعك اتفضل احكي كلي أذاناً صاغية

هطول عليك بس مليش فيه انت اللي جبته لنفسك

انا الحكاية وما فيها اني كنت عايش من يومي مبعملش حاجة فى حياتي اكتر من اني بفكر فى كل حاجة حوالية الدنيا ماشية ازاي وانا وضعي فيها ايه ومستريح ولا لا ولما حد يقولي كلمة اقعد افكر قالها ليه ويا ترى ده فى مصلحتي ولا لا وده بيحبني ولا لا وانا ماشي صح ولا غلط

الحكاية اني كنت وحيد مكنش ادامي غير اني افكر واكلم نفسي واشوف ايه اللي يريحني وايه يوجعني واحاول ابعد طبيعي عن اللي بيوجعني ذي اي بنى ادم بيفهم وعاقل

لحد ما حصلي حاجة جميلة اوي فى حياتي وهي اني حبيت وعدت سنة واتنين لدرجة اني اتمسكت بموضوع الحب ده وبقى هو حياتي وحلمي وكل ما ليه فى الماضي والحاضر والمستقبل وبدات ابني حياتي عليه واتخليت عن اي افكار تانية تشغل بالي

كمـــل

كنت بنجح عشان الحب

كنت بلبس عشان الحب

كنت باكل عشان الحب

كنت بخف من مرضي عشان الحب

كنت بمشي مع ده واسيب ده عشان الحب

كنت بحلم ببكرة عشان الحب

تخليت عن كل حاجة بقولك عشان الحب

لحد ما جه اليوم اللي بدا فيه الحب يتخلا هو عني طبعا مش الحب اقصد صاحبة الحب ده كله اللي اخدت الجمل بما حمل خدت الخير كله وكانت عاوزة تطير

ومن هنا بدات امشي ورا الوجع مش ذى زمان اعرف اللي بيوجعني واهرب منه ارتبطت بيها اكتر وبقت كل حياتي وقدمت تنازلات الدنيا والاخرة عشان انول اي حاجة مجرد انها تبقى موجودة فى حياتي ولو كاخت صديقة اي صفة المهم اني حلمي مش يضيع مني كده مره واحدة وانا اقف اتفرج عليه

كمــل

مش هطول اكتر من كده لان الكلام كتير فى سبيل ما انا كنت عاوز ده اتخليت عن كرامتي ورجولتي وكلمتي وشعري وحياتي وشخصيتي وكياني ووجودي واحلامي وبقت كل حياتي متوقفة على شوية كلام اسمعهم منها لا اكتر ولا اقل

بعدت عني مرة واتنين وتلاتة بشكل من الاشكال مش شكل نهائى يعني وكنت انا اللي برجع واطلب اني انول الرضا

ده خلا قيمتي فى السوق متسواش تعريقة ذى ما بيقولوا

ومن هنا بدات اخسر نفسي اللي لحد النهاردة محدش قدر يرجعها ليه حتى الانسانة اللي فكرت ارتبط بيها بعدها

اول مرة اتكلم بالصراحة دي على الملأ وخايف اندم اني عملت كده

بس يالا محدش واخد منها حاجة

السؤال الي نفسي اوجه لنفسي اللي انا مش لاقيها من الاساس

ازاي بعد مرحلة عدت الخمس سنين كنت باني فيها احلامي بشكل معين وحياتي ماشية على نظام معين بيطلبوا مني اني اغيره بكل بساطة

احلم بأيه أحب ايه اكره أيه احتاج ايه اصاحب مين اكون لمين اروح فين اجي منين وايه لازمة ده كله وانا مش لاقي نفسي

انا صح ولا غلط ولا عارف اي حاجة

اكره نفسي احبها هو انا اصلا لاقيها

ضاعت نفسي مع الايام اللي ضاعت

والسبب - القضية اتقيدت ضد مجهول

من يوميها لحد النهاردة تايه التوهه دايه

كمـــل

جايز ناس تبصلي نظرة اني تافه بعد ما عرفت الحقيقة وجايز ناس تانية تبصلي على اني شخص عادي وناس تالتة هي اللي هتشوفني على اني اسطورة وبقت بتتكرر كتير فى الزمن ده على ايد بنات مش واخدين الحب اكتر من انه لعبة بيتسلوا بيه وبيعدوا بيها الايام اللي عايشنها يشبعوا فيها رغباتهم ومصالحهم لحد ما يجيلها الشاب اللي تتمنى تكون زوجه ليه يشرفها وتقلب الزبون

مش عارف ابص لنفسي على اني اي واحد فيهم لاني لسة مش راسي ولا ثابت

محير نفسي ومحير الناس معايا وزعل ناس كتير بحالتي اللي مش لاقيلها وصف

اااااااااااااااااااااااااااااااه

اااااااااااااه ايه يا راجل دا انا اللي اه انت لسه عايش وكل ده فيك واحد غيرك كان مات من زمان

روح يا ابني ربنا يرحمك

.......................................................

ايدي تعبت من الكتابة ومتاكد ان محدش هيقرا البوست لنهايته الا كان يهمه امري

لذلك اكيد محدش هيسيب بوست الا اذا كان بيعز حسام فعلا وخايف عليه

يا ترى كام واحد بيخاف عليه فى الزمن ده

مستني اشوف

واوعدكم بحلقات قادمة عن حسام

اقل طولا طبعا من البلوة اللي انا كاتبها دي