فضفضة

بقالي كتير لوحدي مش مختلط كتير باللي حواليه

شكلي عملتها ونفذت اللي فى دماغي فى اني ابعد عن اللي حواليه شوية واشوف انا رايح فين وجاي منين

منكرش اني لسة مش عارف انا عاوز ايه وعاوز مين جنبي

كل اللي عايزه اني ارتاح واريح الناس من حواليه

المسالة كلها جايز حلها فى كلمتين وساعات كتير بنبقى اللي بندور عليه ادامنا ومش لاقينه

بس نقول ايه شكلي ماشي بالمقلوب ومش عارف انا بعمل ايه

مسيطرة عليه فكرة ان مفيش حل غير اني اسيب البلد كلها فى اقرب فرصة واخرج بره مصر

اعيش لوحدي بعيد عن كل الناس اللي ممكن يعرفوني ابني واحد تاني غيري

ابنيه بمزاجي احط فيه اللي انا عاوزه واللي شايفه وحش ابعده ومخلهوش قريب منه

حاسس اني هرتاح السفر عندي بقى فكرة مقدسة بالنسبة ليه وبقى هو الحل الامثل لكل المشاكل اللي فى حياتي

المشكلة ان لحد ما يجي وقت السفر ده اعيش ازاي وامشي ازاي وارضى مين وازعل مين والاقي نفسي فين

مليون سؤال ممكن اسالهم لنفسي فى الفترة دي

تعرفوا اني حتى مش عارف ايه السؤال الصح اللي لازم اساله لنفسي

ايه السؤال اللي لازم اساله عشان اعرف الاجابة عليه ومنها اعرف سبب كل اللي انا فيه

ذى ما اكون مجروح ومش عارف فين مكان الجرح عشان اعالجه

كل اللي انا حاسس بيه وجع وألم فى اكتر من مكان

لكن ايه السبب الرئيسي انا مش عارف

مقداميش اقول غير يارب ارتاح

اكيد هو اعلم بيه ومن اي حد على وش الدنيا باللي فيه وعارف ايه السبب فى اللي انا فيه وعارف ايه الحل كمان

معلش طولت عليكم فى الفضفضة

حسام