حلم

بقالي من الايام ما يسمح اني اقول اني استقريت على الحال اللي انا فيه

وهو حالي بأني حاسس اني احسن مما كنت عليه

اتكلمت وقولت اني حاسس اني متغير وحاسس بسعادة برغم اني مفيش حاجة مميزة

بس متكلمتش وقولت ان ده أثر فى اهدافي واحلامي او لا

متكلمتش وقولت اني لسة ذى ما انا بحلم اني فى يوم من الايام احقق احلامي

كنت وصلت فى مرحلة اني خلاص زهقت من اني احلم من كتر النكد اللي كنت ببقى فيه

نتيجة لان الاحلام عمالة تقع واحد ورا التاني

حتى اني وصلت فى مرحلة اني اقول طيب احقق حلم وبلاش حلم

يعني واحد بس كفاية بقيت بخيل على نفسي فى اني احلم بحاجات نفسي فيها وبحبها

يا ترى ايه الحلم اللي فى حياتي اللي عمري ما اتخليت عنه ودايما فى بالي وشاغلني

هتصدقوني لو قولت ليكوا اني من كتر التوهه اللي توهتها فى حياتي مبقتش عارف ايه هو الحلم اللي يستحق اني افضل عايش ليه

فى البداية كنت بقول الحبيبة اللي لا يمكن اعيش من غيرها وهموت لو راحت من حياتي

وعدت الفترة دي وانصب كل تركيزي على الدراسة والشغل والمستقبل واني لازم انجح

حسيت ان الامر ممل ولاقيت ان اسلم حل ان يبقى هدفي فى الحياة اني ابقى سعيد ويبقى حواليه ناس بيحبوني وبحبهم

مراحل عمالة تعدي عليه فى حياتي مرحلة ورا مرحلة

بس تعرفوا لما بقعد مع نفسي القعدة دي وانا بكتب وانا طبعا بسمع عمر خيرت

بتخيل ان اجمل حلم ممكن احلمه

هو اني احقق اي مشهد جميل شوفته فى حياتي

دايما كنت بتأثر باللي بتفرج عليه

وكنت بحلم اني ابقى فى المكانة دي بحلوها ومرها

اي مشهد فى اي فيلم جميل

او اي لوحة فى معرض او حتى شوفتها عالنت

او اي حتة موسيقى اسمعها واتاثر بيها

غنوة احس جواها اني فيها كتير مني

كل دي حاجات جميلة متخيلة اجمل احلام انا حلمتها

لانها بنظري كانت مثالية للحد اللي يخليني مشكش فى لحظة ان ده شئ رائع وجميل

تعرفوا بجد ايه اجمل حلم حلمت بيه

كنت دايما بحلم بشقة كبيرة

كبيرة بحيث يسمح حجمها باني احط فيها كل حاجة بحبها

واحط فيها زوقي وحسي فى كل ركن فيها

الالوان والاضاءة والاثاث واوض النوم واوضة الاطفال

والرسيبشن والصالة والبلكون حتى الحمام والمطبخ

ابدع فى كل ركن فيها

كان اول حاجة بتيجي ببالي اوضة الاطفال ازاي هملاها لعب وحاجات جميلة اي طفل فى الدنيا يتمناها

كان ده حلمي

لما كان بيكبر واقول عليه مستحيل

كان بيتواجد معاه بنت جميلة بتحبني واحبها

وعندي منها بنت وولد

ومعيشهم فى نعيم

وبقعد اتخيل تفاصيل حياتي يوم ورا التاني وانا عايش وياهم

حقيقي حلم كبير اوي

عالعموم مش هطول عليكوا

بس يا ترى انتوا بتحلمي ذيي كده ولا احلامكم مختلفة عني

مع تحياتي

سمسم